- 670 -

1440. (?) Mai 12. Ottmachau.

Conrad von gotis gnaden bischoff zu Breslaw.
Erbern vnd weisen lieben gonnere. Als ir vns schreibet, wie ir nv am montage des tags auch mit den vom Prostansz gelegit zu Breslaw gewart hett, dorczu die vom Prostansz nicht komen weren etc. doruff lossin wir euch wissen, das wir den tag kein der Neisse hatten gelegit, ist euch denne kein Breslaw vorgeboten, dorum ist vergessenheit gescheen vnd her Jurzik hat vns auch vor dem tage geschreben, als wir euch seinen brieff senden hirynne verslossin, den wir vor acht tagen vnserm schreiber befolen habin euch zuschaffin, doran er lass gewest ist, hirumbe begern wir von euch, das ir vns nach vorschreibet, wenne ir vff einen tag kein der Neisse komen mogit nach Johannis vnd vor Jacobi, so wellin wir vff denselben tag hern Jurziken dohin kein der Neisse mit euch vor vns vorbescheiden vnd tuen in den sachen, was do recht sein wirt. Gebin zu Ottmuchow am donrstage vor Pfingsten.

Rückaufschrift: Den erbern vnd weisen., ratmannen zu Legnicz.

Orig. Kgl. Bibl. z. Berl. Ms. Boruss. fol. 567. No. 65.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866